Liquidez

N'economía, la lliquidez representa la cualidá de los activos pa ser convertíos en dineru efeutivu de forma inmediata ensin perda significativa del so valor. De tal manera que cuanto más fácil ye convertir un activu en dineru dizse que ye más líquidu. Por definición l'activu con mayor lliquidez ye'l dineru, ye dicir los billetes y monedes tienen una absoluta lliquidez, d'igual manera los depósitos bancarios a la vista, conocíos como dineru bancario, tamién gocien d'absoluta lliquidez y por tanto dende'l puntu de vista macroeconómicu tamién son consideraos dineru.

A títulu d'exemplu, un activu bien líquidu ye un depósitu nun bancu que'l so titular en cualquier momentu puede allegar a la entidá y retirar el mesmu o inclusive tamién puede faelo al traviés d'un caxeru automáticu. Pela cueta un bien o activu pocu líquidu puede ser un inmueble nel que desque se toma la decisión de vendelo o tresformalo en dineru hasta que efeutivamente llógrase'l dineru pola so venta puede trescurrir un tiempu enllargáu.

Polo xeneral la lliquidez d'un activu ye contrapuesta a la rentabilidá qu'ufierta'l mesmu, de manera que ye probable qu'un activu bien líquidu ufierte una rentabilidá pequeña.

Un activu líquidu tien dalgunes o delles de les siguientes carauterístiques: (1) pue ser vendíu rápido, (2) con una mínima perda de valor, (3) en cualquier momentu. La carauterística esencial d'un mercáu líquidu ye qu'en tou momentu hai dispuestos compradores y vendedores.